ຈີນເດີນຫນ້າຊ່ວຍເຫລືອຢູໂຣບ

ສຳນັກຂ່າວຕ່າງປະເທດລາຍງານ ເມື່ອວັນທີ່ 19 ມີນາ 2020 ວ່າ ບຸກຄະລາກອນການແພດຂອງຈີນຈຳນວນຫນື່ງລົງພື້ນທີ່ເມືອງປາໂດວາ ໃນແຄ້ວນເວເນໂຕ ທາງພາກເຫນືອຂອງອິຕາລີ ເພື່ອສະຫນັບສະຫນູນການເຮັດວຽກຂອງເຈົ້າຫນ້າທີ່ທ້ອງຖິ່ນ ໃນການໃຫ້ຄວາມຊ່ວຍເຫລືອຜູ້ຕິດເຊື້ອໄວຣັດໂຄໂຣນາສາຍພັນໃຫ່ມ ຫລືໂຄວິດ-19 ໂດຍເມືອງປາໂດວາເປັນຫນື່ງໃນພື້ນທີ່ວິກິດທີ່ສຸດ

ທັງນີ້ ທີມຜູ້ຊ່ຽວຊານດ້ານສາທາລະນະສຸກກຸ່ມດັງກ່າວເປັນສ່ວນຫນື່ງຂອງບຸກຄະລາກອນ 37 ຄົນ ພ້ອມສິ່ງຂອງບັນເທົາທຸກຫລາຍຊະນິດ ມີນ້ຳຫນັກລວມປະມານ 20 ໂຕນ ຊື່ງເດີນທາງເຖິງອິຕາລີເມື່ອກາງອາທິດນີ້ ແລະນັບເປັນທີມງານຊຸດທີ່ 2 ໂດຍສ່ວນໃຫ່ຍຈະປັກຫລັກທີ່ແຄ້ວນລອມບາຣເດຍ ຊື່ງຢູ່ຕິດກັບແຄ້ວນເວເນໂຕ ແລະຖືເປັນ ພື້ນທີ່ສີແດງ ໃນການລະບາດຂອງໂຄວິດ-19 ໃນອິຕາລີ

ດ້ານທ່ານລຸຍຈິ ດີ ໄມໂອ ລັດຖະມົນຕີກະຊວງການຕ່າງປະເທດອິຕາລີ ກ່າວວ່າລັດຖະບານ ແລະຊາວອິຕາລີຈະບໍ່ມີວັນລືມນ້ຳໃຈຈາກ ມິດແທ້ໃນຍາມລຳບາກ ໂດຍນອກຈາກຄວາມຊ່ວຍເຫລືອຈາກລັດຖະບານຈີນທີ່ມອບໃຫ້ກັບອິຕາລີແລ້ວ ມູນລະນິທິອາລີບາບາຂອງທ່ານແຈັກ ຫມ່າ ຍັງສົ່ງຫນ້າກາກອານາໄມມາສົມທົບໃຫ້ອີກ 1 ລ້ານອັນດ້ວຍ
ຂະນະທີ່ສະຖານເອກອັກຄະລັດຖະທູດຈີນປະຈຳນະຄອນມາດຣິດລາຍງານວ່າ ຫນ້າກາກອານາໄມທາງແພດຫລາຍແບບລວມ 1.8 ລ້ານອັນ ເດີນທາງເຖິງອິຕາລີ ແລະສະເປນແລ້ວ ໂດຍເປັນລ໊ອດທີ່ສອງຕໍ່ຈາກສະພາກາແດງຈີນສົ່ງໄປຍັງທັງສອງປະເທດ ເມື່ອອາທິດຜ່ານມາ ດ້ານກະຊວງການຕ່າງປະເທດຂອງຝຣັ່ງ ໂປແລນ ແລະເນເທີແລນ ເປີດເຜີຍວ່າໄດ້ຮັບຫນ້າກາກອານາໄມ ຈຳນວນຫນື່ງ ຈາກລັດຖະບານຈີນເຊັ່ນກັນ

ສ່ວນນາງອັວຊູລາ ຟອນ ແດຣ ເລເຍນ ປະທານຄະນະກຳມະທິການຢູໂຣບ ກ່າວວ່າໄດ້ສົນທະນາທາງໂທລະພາບກັບນາຍົກລັດຖະມົນຕີຫລີ່ ເຄີ່ສຽງ ຂອງຈີນເມື່ອວັນພຸດທີ່ຜ່ານມາ ຊື່ງຕົນໄດ້ສະແດງຄວາມຊາບຊື້ງ ແລະຂອບໃຈລັດຖະບານຈີນຈາກການທີ່ທ່ານຫລີ່ກ່າວວ່າຈີນ ກຽມສົ່ງຊຸດກວດຫາເຊື້ອໄວຣັດໂຄໂຣນາສາຍພັນໃຫ່ມ 500.000 ຊຸດ ແລະຫນ້າກາກອານາໄມທາງການແພດອີກ 2 ລ້ານອັນໃຫ້ກັບສະຫະພາບຢູໂຣບ (ອີຢູ) ເພື່ອກະຈາຍຕໍ່ໃຫ້ກັບສະມາຊິກແຕ່ລະປະເທດ ໃນການຕໍ່ສູ້ກັບໄວຣັດໂຄວິດ-19 ໃນຢູໂຣບ ຊື່ງຕອນນີ້ກຳລັງເປັນພື້ນທີ່ວິກິດທີ່ສຸດ