ອາເມຣິກາພົບໂຄວິດ-19ຢູ່ໃນອາກາດໄດ້ເປັນຊົ່ວໂມງແລະຢູ່ເທີງພື້ນຜິວໄດ້ຫລາຍວັນ

ສຳນັກຂ່າວຊິນຫົວລາຍງານ ເມື່ອວັນທີ 17 ມີນາ 2020 ວ່າ ວາລະສານການແພດເດະນິວອິງແລນ ຂອງອາເມຣິກາ ເຜີຍແຜ່ຜົນການສຶກສາຫລ້າສຸດທີ່ພົບວ່າໄວຣັດໂຄວິດ-19 ດຳລົງຢູ່ໄດ້ດົນຫລາຍຊົ່ວໂມງໃນລະອອງລອຍໃນອາກາດ (aerosol) ຈົນເຖິງຫລາຍວັນເທີງພື້ນຜິວຕ່າງໆ

ຄະນະນັກວິທະຍາສາດພົບວ່າໄວຣັດໂຄໂຣນາສາຍພັນໃຫ່ມ ຢູ່ໃນລະອອງລອຍໃນອາກາດໄດ້ດົນສູງສຸດ 3 ຊົ່ວໂມງ ຢູ່ເທີງທອງແດງໄດ້ດົນເຖິງ 4 ຊົ່ວໂມງ ຢູ່ເທີງເຈ້ຍໄດ້ດົນສູງສຸດ 24 ຊົ່ວໂມງ ຢູ່ເທີງພຣາສະຕິກ ແລະເຫລັກກ້າໄຮ້ຂີ້ຫມ້ຽງໄດ້ດົນສູງສຸດ 2-3 ວັນ ການສຶກສາຂ້າງຕົ້ນຂອງສະຖາບັນສຸຂະພາບແຫ່ງຊາດ ຂອງອາເມຣິກາໄດ້ມອບຂໍ້ມູນສຳຄັນກ່ຽວກັບການຄົງສະພາບ ຂອງໄວຣັດໂຄໂຣນາສາຍພັນໃຫ່ມ ແລະບົ່ງຊີ້ວ່າຜູ້ຄົນອາດໄດ້ຮັບເຊື້ອຜ່ານອາກາດ ແລະຫລັງສຳຜັດວັດຖຸທີ່ປົນເປື້ອນເຊື້ອໄວຣັດດັງກ່າວ

ນັກວິທະຍາສາດຂອງສະຖານບັນຊື່ງມາຈາກຫ້ອງປະຕິບັດການເຂົາຣ໊ອກກີສັງກັດສະຖາບັນໂລກພູມແພ້ ແລະໂລກຕິດເຊື້ອແຫ່ງຊາດ ທຳການປຽບທຽບວ່າສະພາບແວດລ້ອມມີຜົນກະທົບຕໍ່ໄວຣັດໂຄໂຣນາສາຍພັນໃຫ່ມ ຢ່າງໃດແນ່ ສ່ວນການສຶກສາການຄົງສະພາບຂອງໄວຣັດໂຄໂຣນາທັງສອງສາຍພັນພົບວ່າມີພຶດຕິກຳຄ້າຍຄືກັນຈົນເຮັດໃຫ້ບໍ່ສາມາດອະທິບາຍໄດ້ວ່າເປັນຫຍັງໂລກໂຄວິດ-19 ກາຍເປັນໂລກລະບາດຂະຫນາດໃຫ່ຍກວ່າໂລກຊາຣສຢ່າງຫລາຍ

ນັກວິທະຍາສາດພະຍາຍາມຈຳລອງໄວຣັດທີ່ສະສົມຢູ່ໃນຮ່າງກາຍຜູ້ຕິດເຊື້ອໄປຈົນເຖິງໄວຣັດເທີງພື້ນຜິວຕ່າງໆ ໃນຄົວເຮືອນຫລືໂຮງຫມໍທີ່ເກັບຈາກການໄອຈາມຫລືການສຳພັດວັດຖຸ ຈາກນັ້ນກວດສອບວ່າໄວຣັດຍັງຄົງແຜ່ເຊື້ອເທີງພື້ນຜິວເຫຼົ່ານັ້ນໄດ້ດົນເທົ່າໃດ ການຄົ້ນພົບຄັ້ງນີ້ຕອກຢ້ຳຄຳຊີ້ຈາກຜູ້ຊ່ຽວຊານດ້ານສາທາລະນະສຸກທີ່ໃຫ້ປະຕິບັດຕາມຂໍ້ຄວນລະວັງຄ້າຍກັບໂລກໄຂ້ຫວັດໃຫ່ຍ ແລະໂລກລະບົບທາງເດີນຫາຍໃນອື່ນໆ ເພື່ອປ້ອງກັນການແຜ່ລະບາດຈາກໄວຣັດໂຄວິດ-19

ຂໍ້ຄວນລະວັງດັງກ່າວກອບດ້ວຍຫລີກລ້ຽງການໃກ້ຊິດຄົນທີ່ເຈັບປ່ວຍ, ຫລີກລ້ຽງການສຳຜັດ ດວງຕາ , ດັງ ແລະປາກ ຢູ່ແຕ່ໃນບ້ານຫາກບໍ່ສະບາຍ, ໃຊ້ເຈ້ຍທິດຊູ້ປິດດັງ ແລະປາກຫາກໄອຫລືຈາມ ເຮັດຄວາມສະອາດ ແລະຂ້າເຊື້ອວັດຖຸ ແລະພື້ນຜິວທີ່ສຳຜັດເປັນປະຈຳ

ອີກຢ່າງ ການສຶກສາເກີດຈາກຄວາມຮ່ວມມືລະຫວ່າງນັກວິທະຍາສາດຂອງສະຖາບັນສຸຂະພາບແຫ່ງຊາດ ສູນຄວບຄຸມ ແລະປ້ອງກັນໂລກ ມະຫາວິທະຍາໄລແຄລິຟໍຣເນຍ ມະຫາວິທະຍາໄລລອສແອນເຈລິສ ແລະມະຫາວິທະຍາໄລພຣິນຕັນຂອງອາເມຣິກາ