ຍີ່ປຸ່ນ ແຈກເງີນສົດໃຫ້ປະຊາຊົນເພື່ອຊ່ວຍບັນເທົາຜົນກະທົບຈາກໄວຣັດ

ສຳນັກຂ່າວຕ່າງປະເທດລາຍງານເມື່ອວັນທີ 18 ມີນາ 2020 ວ່າ ລັດຖະບານຍີ່ປຸ່ນ ແລະພັກຮ່ວມລັດຖະບານກຳລັງພິຈາລະນາໃຫ້ເງີນແກ່ປະຊາຊົນເພື່ອກະຕຸ້ນການໃຊ້ຈ່າຍສ່ວນບຸກຄົນທີ່ຫລຸດລົງສະເພາະຊ່ວງການລະບາດຂອງໂຄໂຣນາໄວຣັດສາຍພັນໃຫ່ມ ຫລືໂຄວິດ-19

ຂ່າວເຜີຍວ່າເຈົ້າຫນ້າທີ່ ແລະຜູ້ຮ່າງກົດຫມາຍກຳລັງສຶກສາຄວາມເປັນໄປໄດ້ທີ່ຈະແຈກເງີນສົດຫລາຍກວ່າ 12,000 ເຢນ (ປະມານ 1 ລ້ານກີບ) ຕໍ່ຄົນຊື່ງເປັນຈຳນວນເງີນເທົ່າກັບທີ່ລັດຖະບານມອບໃຫ້ກັບຄົນຍີ່ປຸ່ນທຸກຄົນໃນປີ 2009 ເພື່ອຕອບສະຫນອງຕໍ່ວິກິດການເງີນໂລກຫລັງຈາກການລະລາຍຂອງສະຖາບັນການເງີນຊັ້ນນຳໃນອາເມຣິກາ

ການແຈກເງີນສົດທີ່ອາດເປັນສ່ວນຫນື່ງຂອງມາດຕະການສຸກເສີນທາງເສດຖະກິດທີ່ລັດຖະບານຍີ່ປຸ່ນຈະຜັກດັນອອກມາໃນຊ່ວງຕົ້ນເດືອນເມສານີ້ ລັດຖະບານ ແລະພັກຮ່ວມລັດຖະບານຊື່ງປະກອບດ້ວຍພັກເສລີປະຊາທິປະໄຕ ແລະພັກໂຄເມໂຕຈະຈັດເຮັດລາຍລະອຽດຕ່າງໆເຊັ່ນ ລັດຖະບານຈະໃຫ້ເງີນແກ່ປະຊາຊົນທຸກຄົນຫລືໃຫ້ຈຳນວນຈຳກັດສະເພາະຄອບຄົວທີ່ມີລູກ ແລະຄອບຄົວທີ່ມີລາຍໄດ້ຫນ້ອຍ

ພັກຮ່ວມລັດຖະບານຈະຕັດສິນໃຈຫລັງຈາກພິຈາລະນາຄວາມເຫັນຈາກຜູ້ຊ່ຽວຊານໃນການປະຊຸມທີ່ຈະເລີ່ມຕົ້ນໃນວັນພະຫັດນີ້ ເຊິ່ງການລະບາດຂອງໄວຣັດເຮັດໃຫ້ຫລາຍຄົນໃນຍີ່ປຸ່ນງົດການອອກໄປຂ້າງນອກ ເຮັດໃຫ້ຈຳນວນນັກທ່ອງທ່ຽວຂາເຂົ້າຫລຸດລົງຢ່າງຫລາຍຊື່ງສົ່ງຜົນກະທົບຕໍ່ການບໍລິໂພກພາຍໃນປະເທດ ແລະເຮັດໃຫ້ພາກການທ່ອງທ່ຽວກະທົບຢ່າງຫນັກ