ຝຣັ່ງ ງົດເກັບຄ່ານ້ຳ ຄ່າໄຟ ຄ່າເຊົ່າ ເພື່ອຊ່ວຍປະຊາຊົນ

ສຳນັກຂ່າວຕ່າງປະເທດລາຍງານເມື່ອວັນທີ 18 ມີນາ 2020 ວ່າ ທ່ານເອັມມານູເອລ ມາຄຣົງ ປະທານາທິບໍດີຝຣັ່ງ ປະກາດວັນທີ 17 ມີນາ ວ່າຈະລະງັບການເກັບຄ່ານ້ຳ ຄ່າໄຟ ແລະຄ່າເຊົ່າ ສຳລັບທຸລະກິດຂະຫນາດນ້ອຍທົ່ວປະເທດ ເພື່ອບັນເທົາຜົນກະທົບຈາກຄຳສັ່ງປິດຮ້ານຄ້າ ທີ່ອອກມາກ່ອນຫນ້ານີ້ ຕາມແຜນການສະກັດການແຜ່ລະບາດຂອງເຊື້ອໄວຣັດໂຄໂຣນາສາຍພັນໃຫ່ມ 2019 ຫລື ໂຄວິດ-19


ຜູ້ນຳຝຣັ່ງຍັງເຜີຍດ້ວຍວ່າຈະໃຊ້ງົບປະມານ 300.000 ລ້ານຢູໂຣ ເພື່ອຊ່ວຍເຫລືອທາງການເງີນແກ່ບໍລິສັດຕ່າງໆ ທີ່ຕ້ອງຢຸດກິດຈະການລົງຊົ່ວຄາວລະຫວ່າງວິກິດພະຍາດລະບາດຄັ້ງນີ້ ທ່ານມາຄຣົງ ຍັງອອກຄຳສັ່ງໃຫ້ປະຊາຊົນທຸກຄົນກັກໂຕຢູ່ແຕ່ໃນບ້ານເຮືອນເປັນເວລາ 15 ວັນ ແລະປິດຊາຍແດນທັງຫມົດນັບຈາກທີ 17 ມີນາ ຕາມເວລາທ້ອງຖິ່ນດົນ 30 ວັນ
ມາດຕະການດັງກ່າວຈະເຮັດໃຫ້ປະຊາຊົນອອກນອກບ້ານຫລືທີ່ພັກບໍ່ໄດ້ ແຕ່ຍົກເວັ້ນສະເພາະຄົນທີ່ເຮັດວຽກຈາກທີ່ບ້ານບໍ່ໄດ້ແທ້ໆ ຫລືອອກໄປຊື້ອາຫານຫລືຢາ ຫລືພົບແພດຫລືອອກໄປເຮັດວຽກງານສຳຄັນທີ່ກ່ຽວກັບດ້ານຄອບຄົວ ຢ່າງເຊັ່ນ ພາລູກໄປຫາພໍ່ຫລືແມ່ຂອງເດັກທີ່ບໍ່ໄດ້ຢູ່ດ້ວຍກັນຫລືຕ້ອງເບິ່ງແຍງຍາດຜູ້ໃຫ່ຍທີ່ຊ່ວຍເຫລືອຕົວເອງລຳບາກ
ນອກຈາກນີ້ລັດຖະບານຝຣັ່ງຍັງຍົກເວັ້ນໃຫ້ອອກກຳລັງພາຍໃນພື້ນທີ່ລະແວກໃກ້ທີ່ພັກໄດ້ດ້ວຍ

ການເຄື່ອນໄຫວນີ້ເກີດຂື້ນຫລັງຈາກທ່ານເອດູອາຣ ຟີລິບນາຍົກລັດຖະມົນຕີຝຣັ່ງ ປະກາດເມື່ອວັນ 14 ມີນາຜ່ານມາ ໃຫ້ສະຖານບັນເທີງ ຮ້ານອາຫານ ແລະຮ້ານຄ້າອື່ນໆ ທີ່ບໍ່ໄດ້ຂາຍສິນຄ້າຫລືໃຫ້ບໍລິການທີ່ຈຳເປັນປິດກິດຈະການຊົ່ວຄາວ

 

ມາຮອດວັນທີ 18 ມີນາ 2020 ຝຣັ່ງມີຜູ້ຕິດເຊື້ອໄວຣັດໂຄວິດ-19 ແລ້ວ 9.052 ຄົນ ເສຍຊີວິດແລ້ວ 148 ຄົນ