ພາລະກິດສຳເລັດທີມເຈົ້າຫນ້າທີ່ການແພດຈີນ ຊຸດທຳອິດອອກຈາກຫູເປີ່ຍ

ສຳນັກຂ່າວຊິນຫົວລາຍງານເມື່ອວັນທີ 16 ມີນາ 2020 ວ່າ ທີມແພດກຸ່ມແລກມີກຳນົດເດີນທາງອອກຈາກມົນທົນຫູເປີ່ຍ ຊື່ງເປັນມົນທົນທີ່ເຄີຍໄດ້ຮັບຜົນກະທົບຢ່າງຫນັກຈາກການແຜ່ລະບາດຂອງໄວຣັດໂຄໂຣນາສາຍພັນໃຫ່ມ ຫລືໂຄວິດ-19 ໃນວັນອັງຄານ (17 ມີນາ) ເນື່ອງຈາກສະຖານະການແຜ່ລະບາດນັ້ນດີຂື້ນຢ່າງຫລາຍແລ້ວ


ເຈົ້າຫນ້າທີ່ທາງການແພດຈຳນວນ 3.675 ຄົນຈາກທີມແພດ 41 ທີມທົ່ວປະເທດໄດ້ໃຫ້ຄວາມຊ່ວຍເຫລືອໂຮງຫມໍຊົ່ວຄາວ 14 ແຫ່ງ ແລະໂຮງຫມໍທີ່ກຳນົດ 7 ແຫ່ງໃນນະຄອນອູ່ຮັ່ນ ເມືອງເອກຂອງຫູເປີ່ຍ ແລະເປັນສູນກາງການລະບາດຂອງພະຍາດ

ທີມເຈົ້າຫນ້າທີ່ການແພດຈາກສ່ານຊີທັງ 43 ຄົນ ເປັນແພດ ແລະພະຍາບານຊຳນານການຈາກຜະແນກຕ່າງໆ ປະກອບດ້ວຍຜະແນກຮັກສາສຸກເສີນ ແມ່ແລະເດັກ ລະບົບປະສາດ ແລະຈິດຕະເວຊສັງກັດໂຮງຫມໍປະຊາຊົນມົນທົນສ່ານຊີ


ທີມເຈົ້າຫນ້າທີ່ທະຍອຍຂື້ນລົດເມເມື່ອເວລາ 06:30 ໂມງ ຂອງວັນອັງຄານ (17 ມີນາ) ໂດຍບາງຄົນຕ້ອງແອບເກັບນ້ຳຕາໄວ້ເບື້ອງຫລັງຫນ້າກາກອານາໄມທີ່ໃສ່ຢູ່

ເມື່ອເວລາປະມານ 07:30 ໂມງ ກຸ່ມແພດ 43 ຄົນ ຈາກມົນທົນສ່ານຊີທາງຕາເວັນຕົກສ່ຽງເຫນືອຂອງຈີນ ໂດຍສານລົດເມ 9 ຄັນ ເດີນທາງອອກຈາກອູ່ຮັ່ນ ໂດຍມີເຈົ້າຫນ້າທີ່ຕຳຫຼວດທີ່ດ່ານເກັບຄ່າຜ່ານທາງພິເສດສະແດງຄວາມເຄົາລົບລະຫວ່າງຂະບວນລົດເຄື່ອນຜ່ານ


ເຈົ້າຫນ້າທີ່ທາງການແພດກຸ່ມນີ້ຈະຕ້ອງຢູ່ພາຍໃຕ້ການກັກໂຕຕໍ່ໄປ ສ່ວນພາຫະນະ ແລະອຸປະກອນຕ່າງໆ ນັ້ນຈະຖືກຂ້າເຊື້ອເມື່ອເດີນທາງເຖິງຈຸດຫມາຍ ທັງນີ້ ເມື່ອວັນຈັນທີ່ຜ່ານມາ (16 ມີນາ) ຫູເປີ່ຍມີລາຍງານຜູ້ຕິດເຊື້ອລາຍໃຫ່ມພຽງຄົນດຽວ