ອາເມຣິກາເລີ່ມທົດລອງວັກຊີນຕ້ານໂຄວິດ-19ກັບມະນຸດແລ້ວ

ສຳນັກຂ່າວຕ່າງປະເທດລາຍງານເມື່ອວັນທີ່ 16 ມີນາ 2020 ວ່າ ສະຖາບັນສາທາລະນະສຸກແຫ່ງຊາດຂອງອາເມຣິກາຖະແຫຼງວ່າ ການທົດລອງວັກຊີນຕ້ານໄວຣັດໂຄໂຣນາສາຍພັນໃຫ່ມ ຫລືໂຄວິດ-19 ກັບມະນຸດຈະເລີ່ມຂື້ນທີ່ເມືອງຊີແອດເຕີ້ລໂດຍໃຊ້ອາສາສະຫນັກທົດລອງເປັນຜູ້ມີສຸຂະພາບແຂງແຮງ ອາຍຸລະຫວ່າງ 18-55 ປີ ຈຳນວນ 45 ຄົນ ໃຊ້ເວລາປະມານ 6 ອາທິດໂດຍອາສາສະຫນັກທົດລອງຄົນທຳອິດໄດ້ຮັບວັກຊີນໄປແລ້ວໃນວັນນີ້ ແຕ່ກໍ່ຕ້ອງເບິ່ງໂຕຢາຂອງວັກຊີນນຳວ່າ ມີຄວາມຄືບຫນ້າເຂົ້າສູ່ໄລຍະໃດໄດ້ແນ່ ເພື່ອກວດວ່າໄດ້ຜົນມີປະສິດທິພາບ ແລະປອດໄພເປັນສຳຄັນ

ເຈົ້າຫນ້າທີ່ອາເມຣິກາເຄີຍປະເມີນໄວ້ແລ້ວວ່າ ອາດຈະຕ້ອງໃຊ້ເວລາອີກ 1 ປີເຖິງ 1 ປີເຄີ່ງກ່ອນທີ່ຈະສາມາດໃຊ້ງານໄດ້ ຫາກທຸກຢ່າງເປັນໄປຕາມແຜນ ສຳລັບວັກຊີນໂຕນີ້ມີຊື່ວ່າ mRNA-1273 ພັດທະນາຂື້ນມາໂດຍນັກວິທະຍາສາດ ແລະນັກວິໄຈໃນຫ້ອງທົດລອງຂອງສະຖາບັນສາທາລະນະສຸກແຫ່ງຊາດຂອງອາເມຣິກາ ທີ່ຫ້ອງທົດລອງຂອງບໍລິສັດໄບໂອເທັກໂນໂລຢີຊື່ Moderna ຕັ້ງຢູ່ໃນເມືອງແຄມບຣິດ ລັດແມສຊາຊູເຊຕ ສ່ວນທຶນວິໄຈໄດ້ຮັບການສະຫນັບສະຫນູນຈາກ Coalition for Epidemic Preparedness Innovations(CEPI) ທີ່ນະຄອນອອສໂລ ປະເທດນໍເວ

ຂະນະດຽວກັນທ່ານເທດຣອສ ແອດນາຮອມ ເກເບຣເຍຊຸສ ຜູ້ອຳນວຍການອົງການອານາໄມໂລກກ່າວຮຽກຮ້ອງໃຫ້ປະເທດຕ່າງໆເຮັດການກວດຜູ້ຕ້ອງສົງໃສຕິດເຊື້ອໄວຣັດ ເພາະໃນຊ່ວງອາທິດທີ່ຜ່ານມາພົບການຕິດເຊື້ອຢ່າງວ່ອງໄວ ແລະເສຍຊີວິດເພີ່ມຂື້ນຈາກການແຜ່ລະບາດໄປທົ່ວໂລກນອກເຫນືອຈາກຈີນ