ນາຍົກ ຢັ້ງຢືນກໍລະນີຜູ້ໃດທີ່ມີອາການທີ່ເຂົ້າໃນນິຍາມຂອງພະຍາດໂຄວິດແມ່ນກວດໃຫ້ຟຣີ

ໃນວັນທີ 16 ມີນາ 2020​ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງຕິດຕາມການເຝົ້າລະວັງ ແລະ ຄວບຄຸບການລະບາດຂອງພະຍາດ COVID-19 ຢູ່ທີ່ຂົວມິດຕະພາບແຫ່ງທີ1, ໂຮງໝໍ 103,​ ໂຮງໝໍມິດຕະພາບ ແລະ ສະໜາມບິນສາກົນວັດໄຕ ເຊິ່ງການລົງເຄື່ອນໄຫວເຮັດວຽກໃນຄັ້ງນີ້ ທ່ານນາຍົກໄດ້ຮັບຟັງການລາຍງານຫຍໍ້ກ່ຽວກັບສະພາບການຈັດຕັ້ງປະຕິບັດມາດຕະການຕ້ານ ແລະ ຄວບຄຸມການແຜ່ລະບາດເຊື້ອພະຍາດ COVID-19 ຈາກພາກ ສ່ວນທີ່ກ່ຽວຂ້ອງ.​

ຫຼັງຈາກນັ້ນ ທ່ານ ໄດ້ໃຫ້ສຳພາດຕໍ່ສື່ມວນຊົນໂດຍໄດ້ຢັ້ງຢືນວ່າ: ປັດຈຸບັນນີ້ ສປປ ລາວ ໄດ້ມີຄວາມພ້ອມໃນທຸກດ້ານເພື່ອຮອງຮັບການລະບາດຂອງພະຍາດທີ່ອາດຈະແຜ່ລະບາດ ຢູ່ ສປປ ລາວ ບໍ່ວ່າທາງດ້ານບຸກຄາລາກອນ, ອຸປະກອນການແພດທີ່ທັນສະໄໝ, ສະຖານທີ່ຮອງຮັບຄົນເຈັບ ແລະ ໂຮງໝໍຕ່າງໆ ກໍ່ມີຄວາມກຽມພ້ອມທຸກຢ່າງ. ພ້ອມນັ້ນ,​ ກໍ່ໄດ້ຍ້ອງຍໍຊົມເຊີຍຕໍ່ຜູ້ທີ່ປະຕິບັດໜ້າທີ່ໃນການເຝົ້າລະວັງຢູ່ທຸກຂະແໜງການທີ່ກ່ຽວຂ້ອງ ທີ່ເອົາໃຈໃສ່ໃນການປະຕິບັດໜ້າທີ່ວຽກງານຂອງຕົນຢ່າງມີຄວາມຮັບຜິດຊອບສູງ.

ທ່ານນາຍົກກ່າວວ່າ: ຂໍໃຫ້ທຸກໆພາກສ່ວນຈົ່ງມີສະຕິໃນການເຝົ້າລະວັງ ແລະ ຕິດຕາມຂໍ້ມູນຂ່າວສານຢ່າງໃກ້ຊິດບໍ່ວ່າຈະເປັນຂ່າວປອມ ຫຼື ສ້າງຂ່າວປັ່ນປ່ວນທາງສັງຄົມ ແລະ ອື່ນໆ. ພ້ອມໄດ້ຢ້ຳຕື່ມອີກວ່າ ກໍລະນີຜູ້ໃດທີ່ມີອາການທີ່ເຂົ້າໃນນິຍາມຂອງພະຍາດ COVID-19 ແມ່ນໃຫ້ໄປກວດຟຣີໂດຍບໍ່ໄດ້ເສຍຄ່າ ແລະ ຖ້າຫາກຜູ້ໃດທີ່ຕິດເຊື້ອພະຍາດ COVID-19 ແມ່ນປິ່ນປົວຟຣີເຊັ່ນດຽວກັນ.

cr: Laoyouthfm