ລາວ ມີຄວາມສ່ຽງສູງຕິດໂຄວິດ19 ເນື່ອງຈາກປະເທດໃກ້ຄຽງມີກໍລະນີເກີດຂຶ້ນ

ໃນຕອນແລງວັນທີ 13 ມີນາ 2020, ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານບຸນກອງ ສີຫາວົງ, ລັດຖະມົນຕີກະຊວງສາທາລະນະສຸກ ໃຫ້ສໍາພາດຕໍ່ສື່ມວນຊົນວ່າ: ເນື່ອງຈາກໃນໄລຍະນີ້ ການລະບາດຂອງພະຍາດ COVID -19 ມີການປ່ຽນແປງໄປແລ້ວ ການລະບາດຢູ່ຈີນໄດ້ມີທ່າອ່ຽງຫລຸດລົງຢ່າງຈະແຈ້ງ, ແຕ່ຂະນະດຽວກັນ, ການລະບາດຂອງພະຍາດນີ້ ໄດ້ເພີ່ມສູງຂຶ້ນຢູ່ທາງພາກພື້ນເອີຣົບ ແລະ ປະເທດໃກ້ຄຽງຈໍານວນໜຶ່ງ, ສະນັ້ນອົງການອະນາໄມໂລກ ຈຶ່ງປະກາດໃຫ້ເປັນການລະບາດໃຫ່ຍທົ່ວໂລກແລ້ວ. ມາຮອດເວລາ 24 ໂມງຂອງ ວັນທີ 12 ມິນາ 2020 ທົ່ວໂລກມີລາຍງານ 124ທປະເທດ,, ມີຜູ້ຕິດເຊື້ອ COVID -19 ທັງໝົດ 134.513 ກໍລະນີ, ເສຍຊີວິດ 4.970 ກໍລະນີ ແລະ ປິ່ນປົວຫາຍດີ 68.927 ກໍລະນີ.

ສໍາລັບ ສປປ ລາວເຮົາ, ເຖິງວ່າຍັງບໍ່ພົບການລະບາດຂອງພະຍາດ COVID -19 ກໍ່ຕາມ, ແຕ່ກໍ່ຍັງມີຄວາມສ່ຽງສູງ ຍ້ອນປະເທດໃກ້ຄຽງຍັງມີກໍລະນີເກີດຂຶ້ນ ດັ່ງປະເທດວຽດນາມ , ໄທ, ສ. ເກົາຫລີ ແລະ ປະເທດ ອື່ນໆ; ຍ້ອນແນວນັ້ນ ພາກສ່ວນສາທາລະນະສຸກ ຮ່ວມກັບອົງການອະນາໄມໂລກ ແລະ ອົງການປ້ອງກັນພະຍາດຕິດຕໍ່ຂອງສະຫະລັດອາເມຣິກາ ໄດ້ເຝົ້າລະວັງຢ່າງໃກ້ຊິດ, ນັບທັງບຸກຄະລະກອນ, ອຸປະກອນການແພດ, ສະຖານທີ່ປິ່ນປົວ, ສະຖານທີ່ກັ່ນກອງ ແລະ ເຄື່ອງກວດຫາເຊື້ອຜູ້ທີ່ຕິດພະຍາດນີ້. ຜ່ານມາ ກໍ່ໄດ້ນໍາເອົາຕົວຢ່າງຂອງຜູ້ຕ້ອງສົງໄສ ໄປກວດຫາເຊື້ອ ທັງຢູ່ພາຍໃນ ແລະ ຕ່າງປະເທດ ທັງໝົດ 65 ກໍລະນີ ແຕ່ຜົນກວດຍັງເປັນລົບທັງໝົດ.

ນອກຈາກນັ້ນ, ກະແສຂ່າວທາງສື່ສັງຄົມອອນລາຍທີ່ບໍ່ສ້າງສັນ ໄດ້ສ້າງຄວາມສັບສົນ ດ້ານຈິດຕະສາດ, ທາງດ້ານກາງເມືອງ, ທາງດ້ານຄວາມປອດໄພ ແລະອື່ນໆ ໂດຍໃສ່ໃຮ້າຍປ້າຍສີໃນຫຼາຍຮູບແບບ ເພື່ອສ້າງຄວາມບໍ່ສະຫງົບ ແລະ ສ້າງຄວາມແຕກແຍກໃນສັງຄົມ; ຖ້າຜູ້ໃດຫາກເສບຂໍ້ມູນຂ່າວສານບິດເບືອນກໍ່ຈະເຮັດໃຫ້ພໍ່ແມ່ປະຊົນຊົນ, ພະນັກງານລັດຖະກອນ ເກີດມີຄວາມວາດລະແວງສົງໄສ, ຢ້ານກົວເກີນຂອບເຂດ ແລະ ບໍ່ມີແນວຄິດອຸ່ນອຽງທຸ່ນທ່ຽງໃນການເຮັດວຽກງານຂອງຕົນເອງ, ໂດຍສະເພາະຂ່າວສານໃນເຟສບຸກ ແລະ ແຫຼ່ງຂ່າວທີ່ບໍ່ປອດໄພ ຫຼື ທີ່ບໍ່ເຊື່ອຖືໄດ້ ຕົວຢ່າງ: ກະແສທີ່ອອກມາສອງສາມມື້ຜ່ານມານີ້ ເຊິ່ງກ່າວຫາວ່າ ໂຮງໝໍເມືອງຄົງເຊໂດນ ແຂວງສາລະວັນ ມີຜູ້ຕິດເຊື້ອຕາຍ 13 ຄົນແລ້ວ ແລະ ລັດຖະບານເຊື່ອງອໍາຂໍ້ມູນໄວ້ ແຫຼ່ງຂ່າວນັ້ນມີເຊື່ອວ່າ “News Democracy” ເຊິ່ງເປັນແຫຼ່ງຂ່າວມາຈາກຕ່າງປະເທດເພື່ອສວຍໂອກາດໃນການສ້າງຄວາມບໍ່ສະຫງົບສຸກໃຫ້ແກ່ການດໍາລົງຊີວິດຂອງປະຊາຊົນໃນສັງຄົມລາວ. ສະນັ້ນ, ການທີ່ລັດຖະບານລາວຈະປົກປິດຂໍ້ມູນກັບບັນຫາລະດັບໂລກນີ້ໄວ້ແມ່ນເປັນໄປບໍ່ໄດ້ ເພາະວ່າ ສປປ ລາວ ຮ່ວມມືກັບອົງກັນອະນາໄມໂລກ ແລະ ອົງການສາກົນຫຼາຍພາກສ່ວນ ທີ່ຕ້ອງມີການລາຍງານໃຫ້ຮັບຮູ້ຂໍ້ມູນເຊິ່ງກັນ ແລະ ກັນ ເພື່ອຊອກຫາວີທີແກ້ໄຂຮ່ວມກັນ.

ສະນັ້ນ, ປະຊາຊົນລາວທຸກຄົນຕ້ອງໄດ້ເອົາໃຈໃສ່ ແລະ ມີສະຕິສູງໃນການຮັບຂໍ້ມູນຂ່າວສານ ຫຼື ເບິ່ງຂ່າວ ໂດຍສະເພາະ ສື່ເຟສບຸກ ຫຼື ແຫຼ່ງຂ່າວທີ່ບໍ່ໜ້າເຊື່ອຖື ບໍ່ຄວນກົດໄລ້, ກົດແຊຣ໌ ຂໍ້ມູນເຫຼົ່ານັ້ນອອກສູ່ມວນຊົນ ເພື່ອປ້ອງກັນບໍ່ໃຫ້ຕົກເປັນເຫຍື່ອເປົ້າໝາຍຂອງກຸ່ມຄົນບໍ່ຫວັງດີ ແລະ ທັງຈະສ້າງຄວາມສັບສົນໃຫ້ແກ່ເຈົ້າໜ້າທີ່ໃນການປະຕິບັດງານອີກດ້ວຍ.