ຮອງປະທານປະເທດ ເຄື່ອນໄຫວເຮັດວຽກຢູ່ແຂວງອຸດົມໄຊ

ໃນວັນທີ 23 ກໍລະກົດນີ້, ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ​ໄດ້ລົງເຄື່ອນໄຫວເຮັດວຽກ ແລະ ເຂົ້າຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງອຸດົມໄຊ ຄັ້ງທີ IX ທີ່​ຈະ​ຈັດຂຶ້ນໃນລະຫວ່າງ ວັນທີ 24-25 ກໍ​ລະ​ກົດນີ້ ​ແລະ ​ໄດ້​ຮັບ​ລາຍ​ງານ​ຈາກ​ສະຫາຍ​ເລຂາ​ພັກ​ແຂວງ, ​ເຈົ້າ​ແຂວງ​ອຸດົມ​ໄຊວ່າ:

ມາຮອດປັດຈຸບັນ ແຂວງອຸດົມໄຊ ໄດ້ມີຄວາມພ້ອມ 100% ເພື່ອຈັດກອງປະຊຸມໃຫຍ່ອົງຄະນະພັກແຂວງ ຄັ້ງທີ IX ທີ່​ຈະ​ຈັດຂຶ້ນໃນລະຫວ່າງວັນທີ 24-25 ກໍ​ລະ​ກົດນີ້ ​ເຊິ່ງ​ເປັນ​ແຂວງ​ທຳ​ອິດຂອງ​ທົ່ວ​ປະ​ເທດທີ່​ຈັດ​ກອງ​ດັ່ງກ່າວຂຶ້ນ ​ແລະ ກອງປະຊຸມໃຫຍ່ດັ່ງກ່າວ​ໄດ້​ງົດ​ຫລາຍ​ພິທີການ​ທີ່​ບໍ່​ຈຳ​ເປັນ​ເຊັ່ນ:

ບໍ່ມີການມອບຊໍ່ດອກໄມ້, ບໍ່ມີການສະແດງສິລະປະ, ບໍ່ມີການເຂົ້າອວຍພອນຈາກ 3 ອົງການຈັດຕັ້ງມະຫາຊົນ, ບໍ່ມີການໂຮມຊຸມນຸມມິດຕິ້ງ ​ແລະ ງານ​ລ້ຽງສະຫລອງຜົນສຳເລັດຂອງກອງປະຊຸມ. ທັງ​ນີ້ກໍ​ເພື່ອ​ແນ​ໃສ່ຫລຸດຜ່ອນ​ເລ​ລາ, ຫລຸດຜ່ອນຄ່າໃຊ້ຈ່າຍຕ່າງໆ ທັງ​ເປັນ​ການ​ປະຕິບັດ​ມາດ​ຕະການ​ປ້ອງ​ກັນ​ໂຄ​ວິດ-19 ອີກດ້ວຍ.