ຕະ​ເວນ​ຫາ​ລັກ​ເພື່ອມາ​ໃຊ້​ຈ່າຍ ແຕ່​ສຸດ​ທ້າຍ! ​ເຈົ້າໜ້າ​ທີ່​ຈັບ​ໄດ້​ພ້ອມ​ຮັບ​ສາ​ລະ​ພາບ ສ່ວນ​ຂອງ​ກາງ​ໄດ້​ພຽງ​ລົດ​ຈັກ 1 ຄັນ

ເຈົ້າໜ້າທີ່ພະແນກຕຳຫຼວດໜ່ວຍງານສືບສວນ-ສອບສວນຄະດີອາຍາ-ເສດ ຖະກິດນະຄອນໄກສອນ ພົມວິຫານ ໄດ້ເປີດເຜີຍວ່າ: ໃນເວລາ 4 ໂມງເຊົ້າຂອງວັນທີ 10 ມິຖຸນາ 2020 ເຈົ້າໜ້າທີ່ ປກຊ -ປກສ ບ້ານອຸດົມວິໄລ ນະຄອນໄກສອນ ພົມວິຫານແຂວງສະຫວັນນະເຂດ, ໄດ້ກັກຕົວເປົ້າໝາຍລັກຊັບພົນລະເມືອງຢູ່ຕາມຫ້ອງເຊົ່າພ້ອມເຄື່ອງມືທີ່ໃຊ້ໃນການລັກເປັນຕົ້ນ: ຄີມຕັດເຫຼັກ ມາມອບໃຫ້ເຈົ້າ ໜ້າທີ່ ປກສ ນະຄອນໄກ ສອນ ພົມວິຫານ ເພື່ອດຳເນີນການ ສອບສວນ-ສືບສວນ.

ຜ່ານການສືບສວນ-ສອບ ສວນ ພ້ອມທັງເອົາຄຳໃຫ້ການຂອງຜູ້ຖືກເສຍ. ຜູ້ຖືກຫາຊື່ ທ້າວ ນວນຕາ ອາຍຸ 29 ປີ, ອາຊີບຫວ່າງານ, ຢູ່ບ້ານດົງສານເມືອງອາດສະພອນ ແຂວງສະຫວັນນະເຂດ, ເຊິ່ງຜູ້ກ່ຽວໄດ້ຮັບສາລະພາບວ່າ: ໃນວັນທີ 10 ມີຖຸນາ 2020 ຜູ້ກ່ຽວແມ່ນ ໄດ້ຮ່ວມກໍ່ເຫດກັບທ້າວ ຄຳ ອາຍຸ 19 ປີ, ອາຊີບຫວ່າງງານ, ຢູ່ບ້ານດົງ, ເມືອງໄຊພູທອງແຂວງສະຫວັນນະເຂດ, ເຊິ່ງທັງສອງໄດ້ຮ່ວມກັນວາງແຜນກໍ່ເຫດໃນການລັກຊັບ ພົນລະເມືອງ,

ໃນນັ້ນໄດ້ໃຊ້ຄີມຕັດເຫຼັກເປັນພາຫະນະເບີກ ທາງເຂົ້າ, ຈາກນັ້ນກໍ່ພາກັນເຂົ້າຄົ້ນຫາຊັບສິນ, ໂດຍເນັ້ນໜັກໃສ່ຫ້ອງເຊົ່າທີ່ເຈົ້າຂອງບໍ່ຢູ່ຄັ້ງສຸດທ້າຍແມ່ນເຂົ້າລັກຢູ່ແຖວຫ້ອງເຊົ່າເຂດບ້ານອຸດົມວິໄລ (ຮ່ອມຕະຫຼາດຫຼັກ 8) ເລີຍຖືກເຈົ້າໜ້າທີ່ ປກຊ-ປກສ ກຸ່ມບ້ານອຸດົມວິໄລຈັບໄດ້, ສ່ວນທ້າວ ຄຳ ແມ່ນໄດ້ເອົາຕົວຫຼົບໜີໄປທາງດ້ານຫຼັງ ຫ້ອງເຊົ່າ. ຈາກການຂະຫຍາຍຜົນຄັ້ງນີ້ ທ້າວ ນວນຕາ ຍັງໄດ້ ຮັບສາລະພາບອີກຫຼາຍຈຸດເປັນຕົ້ນ:

ໃນຊ່ວງເດືອນມັງ ກອນ ປີ 2020 ໄດ້ຮ່ວມກັນລັກລົດຈັກຢູ່ເຂດຫ້ອງຫ້ອງ ເຊົ່າແຖວວົງວຽນໄດໂນເສົາ, ຈາກນັ້ນ ເດືອນກຸມພາເຂົ້າລັກ ເງິນຢູ່ແຖວຫ້ອງເຊົ່າເຂດໂພນ ສະຫວັນ, ຕໍ່ມາໃນເດືອນເມ ສາກໍ່ໄດ້ໃຊ້ຄີມຕັດກຸນແຈຫ້ອງເຊົ່າເຂດບ້ານດົງດຳດວນ (ແຖວພັດຕະຄານດາວຮຸ່ງ 2), ຕໍ່ມາອີກໃນເດືອນພຶດສະພາກໍ່ໄດ້ໄປລັກລົດຈັກຢູ່ແຖວຕໍ່ໜ້າໂຮງຮຽນສ້າງຄູຫຼັກ 7,

ຈາກນັ້ນ ໃນເດືອນ ມິຖຸນາ ກໍ່ໄດ້ໄປລັກເງິນຢູ່ຮ້ານຮອຍກວຽນ, ຈົນສຸດທ້າຍມາຈົບຢູ່ທີ່ຫ້ອງເຊົ່າຂອບເຂດບ້ານອຸດົມວິໄລ. ດັ່ງນັ້ນທາງເຈົ້າໜ້າທີ່ຈຶ່ງໄດ້ແຈ້ງຂໍ້ຫາຕໍ່ ທ້າວນວນຕາ ແລະ ທ້າວ ຄຳ ໃນສະຖານລັກຊັບພົນລະເມືອງໂດຍເຈດຕະນາ ເພື່ອນຳສົ່ງໄປຍັງອົງການໄອຍະການປະ​ຊາ​ຊົນ ເພື່ອພິຈາລະນາ ແລະ ມອບໃຫ້ສານຕັດສິນຕາມຄວາມເໝາະສົມ.

ສ່ວນຂອງກາງຄະດີຄື: ລົດຈັກຮອນດາເວບສີແດງ-ດຳ, ປ້າຍທະບຽນ ຈພ 6394 ສະ ຫວັນນະເຂດທີ່ເຈົ້າໜ້າທີ່ເກັບກູ້ຄືນມາໄດ້ແມ່ນໄດ້ເກັບຮັກສາໄວ້ຢູ່ ປກສ ນະຄອນ ໄກສອນ ພົມວິຫານ, ຖ້າໃຜເປັນເຈົ້າຂອງໃຫ້ນຳເອົາຫຼັກຖານ ແລະ ການຢັ້ງຢືນຈາກບ້ານມາຕິດຕໍ່ຮັບເອົາຄືນໄດ້ຕາມໂມງລັດຖະການ.