ສະຫະພັນນັກຮົບເກົ່າແຂວງອັດຕະປື ມອບ-ຮັບໜ້າທີ່ ຜູ້ເກົ່າ ແລະ ຜູ້ໃໝ່

ວັນທີ 17 ກໍລະກົດ 2020 ຜ່ານມານີ້, ສະຫະພັນນັກຮົບເກົ່າແຂວງອັດຕະປືໄດ້ຈັດພິທີມອບ-ຮັບໜ້າທີ່ລະຫວ່າງ ປະທານສະຫະພັນນັກຮົບເກົ່າແຂວງ ຜູ້ເກົ່າ ແລະ ປະທານສະຫະພັນນັກຮົບເກົ່າແຂວງຜູ້ໃໝ່, ຂື້ນຢູ່ທີ່ຫ້ອງປະຊຸມຫ້ອງການຄະນະໂຄສະນາ-ອົບຮົມແຂວງ.

ໂດຍໃຫ້ກຽດເຂົ້າ ຮ່ວມຂອງ ທ່ານ ນ. ມີນາພອນ ໄຊສົມພູ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ຜູ້ຊີ້ນຳ ອົງການຈັດຕັ້ງມະຫາຊົນຂັ້ນແຂວງ, ມີພະນັກງານ-ລັດຖະກອນພາຍໃນຫ້ອງການ ຕະຫຼອດຮອດແຂກຖຶກເຊີນເຂົ້າຮ່ວມຢ່າງພ້ອມພຽງ.

ໃນພິທີ ທ່ານ ຄຳເສົາ ອຳມະສອນ ຮອງຄະນະຈັດຕັ້ງແຂວງ ໄດ້ຂື້ນຜ່ານມະຕິຕົກລົງຂອງຄະນະປະຈຳພັກແຂວງ ເລກທີ 227 ວ່າດ້ວຍການແຕ່ງຕັ້ງຮັບຮອງເອົາ ປະທານ ແລະ ຮອງປະທານ ຄະນະບໍລິຫານງານສະຫະພັນນັກຮົບເກົ່າແຂວງ ສະໄໝທີ IV. ໂດຍຕົກລົງແຕ່ງຕັ້ງເອົາ ທ່ານ ພົນຈັດຕະວາ ກັນໄຍ ໄຊຍະສິດ ເປັນປະທານຄະນະບໍລິຫານງານສະຫະພັນນັກຮົບເກົ່າແຂວງ, ທ່ານ ພັນເອກ ຈັນທະໜາ ກົມມະເມືອງ ແລະ ພັນໂທ ບຸນເຖິງ ແສງພະຈັນ ເປັນຮອງປະທານສະຫະພັນນັກຮົບເກົ່າແຂວງ.

ຈາກນັ້ນ ທ່ານ ພັນໂທ ບຸນເຮັງ ທອງສະຫວັດ ປະທານສະພັນນັກຮົບເກົ່າແຂວງ ຜູ້ເກົ່າ ໄດ້ໃຫ້ກຽດຂື້ນຜ່ານບົດບັນທຶກມອບ-ຮັບໜ້າທີ່ວຽກງານ ທີ່ໄດ້ຊີ້ນຳ-ນຳພາຕະຫຼອດໄລຍະຜ່ານມາ ແລະ ທິດທາງແຜນການສຶບຕໍ່ໃນຊຸມປີຕໍ່ໜ້າ ພ້ອມທັງເຊັນບົດບັນທຶກມອບ-ຮັບໜ້າທີ່ລະຫວ່າງ ປະທານນັກຮົບເກົ່າ ຜູ້ເກົ່າ ແລະ ຜູ້ໃໝ່. ໂດຍຊ່ອງໜ້າ ທ່ານ ນ. ມີນາພອນ ໄຊສົມພູ ແລະ ພາກສ່ວນກ່ຽວຂ້ອງ.

ຂ່າວ: ຄຳຜ່ອງ ສີສຸລາດ