ຊົມເຊີຍ! ດ່ານພາສີສາກົນຂົວມິດຕະພາບ 3 ເກັບລາຍຮັບໄດ້ລື່ນແຜນ

ເຖິງວ່າສະພາບການແຜ່ລະບາດຂອງພະຍາດ ໂຄວິດ-19 ຈະເປັນອຸປະສັກ ແລະ ສິ່ງທ້າທາຍ ຕໍ່ການເກັບລາຍຮັບເຂົ້າງົບປະມານ, ການເຂົ້າ-ອອກຂອງພາຫະນະມີການຫຼຸດລົງ ລວມເຖິງສິນຄ້າປະເພດຕ່າງໆກໍ່ມີການຫຼຸດລົງເຊັ່ນດຽວກັນ ແຕ່ເຖິງຢ່າງໃດກໍ່ຕາມດ່ານພາສີສາກົນຂົວມິດຕະພາບ 3 ກໍ່ໄດ້ສູ້ຊົນບຸກບືນເກັບລາຍຮັບເຂົ້າງົບປະມານຕາມການມອບໝາຍ ຈົນເຮັດໃຫ້ການເກັບລາຍຮັບໃນໄລຍະ 6 ເດືອນ ຕົນປີ 2020 ໄດ້ລື່ນແຜນການທີ່ຄາດຄະເນໄວ້.


ທ່ານ ສົມຫວັງ ສົມຈິນດາ ຫົວໜ້າດ່ານພາສີສາກົນຂົວມິດຕະພາບ 3 ຄຳມ່ວນ-ນະຄອນພະນົມ ໄດ້ໃຫ້ສຳພາດໃນວັນທີ 22 ກໍລະກົດ 2020 ວ່າ: ສະເພາະແຜນການເກັບລາຍຮັບເຂົ້າງົບປະມານໃນປີ 2020 ດ່ານພາສີສາກົນຂົວມິດຕະພາບ 3 ໄດ້ຮັບມອບໝາຍຈຳນວນ 296 ຕື້ກີບ ກວມເອົາ 65.77% ຂອງລາຍຮັບພາສີພາຍໃນແຂວງຄຳມ່ວນ ແລະ ກວມເອົາ 22,76% ຂອງລາຍຮັບກອງຄຸ້ມຄອງພາສີເຂດ VI, ເຊິ່ງໃນ 6 ເດືອນຕົ້ນປີແມ່ນໄດ້ຕັ້ງເປົ້າໝາຍໄວ້ ຈຳນວນ 148 ຕື້ກີບ, ສາມາດຈັດຕັ້ງປະຕິບັດໄດ້ຕົວຈິງ 151 ຕື້ກວ່າກີບ ເທົ່າກັບ 51,30% ຂອງແຜນການປີ ຖ້າທຽບໃສ່ໄລຍະດຽວກັນຂອງປີຜ່ານມາ ສາມາດປະຕິບັດໄດ້ 108,80%, ເຊິ່ງປະເພດສິນຄ້າຫຼັກທີ່ເຮັດໃຫ້ການເກັບລາຍຮັບລື່ນແຜນການສ່ວນໃຫຍ່ແມ່ນ ສິນຄ້ານໍາເຂົ້າ-ສົ່ງອອກ ປະເພດ ກະທິງແດງ, ງົວ, ຄວາຍ, ໝາກໄມ້ສົດ, ເຂົ້າສານ ແລະ ອື່ນໆ ກວມເອົາ 51,62%, ນໍ້າມັນເຊື້ອໄຟ ກວມເອົາ 15,62%, ສິນຄ້ານຳເຂົ້າພາຍໃນ 11,02%, ທໍານຽມຄັງແຮ 12,58%, ທຳນຽມພາຫະນະ ແລະ ເຮືອ ເຂົ້າ-ອອກ 5,46%, ທຳນຽມຜ່ານແດນສາກົນ 3,41%.

ສຳລັບແຜນການໃນ 6 ເດືອນ ທ້າຍປີ ຄາດຄະເນຈະເກັບລາຍຮັບໄດ້ 131,2 ຕື້ກີບ ແລະ ຄາດຄະເນໝົດປີ 2020 ຈະເກັບລາຍຮັບໄດ້ທັງໝົດປະມານ 283 ຕື້ກີບ ເທົ່າກັບ 95,65% ຂອງແຜນການປີ ໂດຍສະເລ່ຍໃນແຕ່ລະເດືອນຕ້ອງເກັບລາຍຮັບໃຫ້ໄດ້ຈຳນວນ 22 ຕື້ກີບ.

ຂ່າວ: ແຂວງຄຳມ່ວນ