ການສອບເສັງຈົບຊັ້ນ ມັດທະຍົມຕົ້ນ ຢູ່ເມືອງຫົງສາ ເຕັມໄປດ້ວຍບັນຍາກາດຄຶກຄື້ນ

ການສອບເສັງຈົບຊັ້ນມັດທະຍົມຕົ້ນ ມ4 ທົ່ວເມືອງຫົງສາ ແຂວງໄຊຍະບູລີ ປະຈຳສົກປີ 2019-2020 ເຕັມໄປດ້ວຍບັນຍາກາດອັນຟົດຟື້ນ, ໂດຍສະເພາະ ບັນດານ້ອງນັກຮຽນນັກສອບເສັງ ພວມສຸມໃສ່ການສອບເສັງ ເພື່ອຍາດເອົາຄະແນນທີ່ດີ.

ດັ່ງນັ້ນ, ການສອບເສັງຈົບຊັ້ນມັດທະຍົມຕົ້ນ ຢູ່ເມືອງຫົງສາ ສົກຮຽນປີນີ້, ໄດ້ຈັດຂຶ້ນຢ່າງເປັນທາງການ ພ້ອມກັບ​ໂຮງຮຽນ​ແຫ່ງ​ຕ່າງໆ​ໃນ​ທົ່ວປະເທດ ໃນຕອນເຊົ້າຂອງວັນທີ 22 ເດືອນກໍລະກົດ​ 2020​ນີ້, ໂດຍການໃຫ້ກຽດເປີດຫົວບົດສອບເສັງຂອງທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ປະທານສູນການສອບເສັງຈົບຊັ້ນຂັ້ນເມືອງໆ ຫົງສາ ພ້ອມຄະນະກຳມະການທີ່ຖືກແຕ່ງຕັ້ງມາຈາກແຂວງ, ເມືອງ ແລະ ຜູ່ອຳນວຍການໂຮງຮຽນ ພ້ອມດ້ວຍນ້ອງນັກຮຽນເຂົ້າຮ່ວມຢ່ງພ້ອມພຽງ.

ສະເພາະຢູ່ສູນເທດສະບານເມືອງ ກໍ່ຄື: ສູນ ມສ ຫົງສາ ການສອບເສັງ ແມ່ນຄຶກຄື້ນພໍສົມຄວນ ບັນດານ້ອງນັກຮຽນໄດ້ມີຄວາມກຽມພ້ອມຮອບດ້ານ,​ຕັ້ງອົກຕັ້ງໃຈ ເຂົ້າໃນການສອບເສັງ ແລະ ປະຕິບັດຕາມກົດລະບຽບຢ່າງເຄັ່ງຄັດ, ຕະຫລອດຮອດບັນດາຄະນະກຳມະການທີ່ໄດ້ແຕ່ງຕັ້ງໄວ້ ກໍມີຄວາມຮັບຜິດຊອບ ຕໍ່ການປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ.

ທົ່ວເມືອງຫົງສາ ມີນັກຮຽນສອບເສັງຈົບຊັ້ນມັດທະຍົມຕົ້ນ ມໍ 4 ທັງໝົດ 379 ນ້ອງ ຍິງ 197 ນ້ອງ. ໂດຍແບ່ງເປັນ 6 ສູນການສອບເສັງເຊັ່ນ: ສູນ ມສ ຫົງສາ ປະກອບມີ 2 ໂຮງຮຽນຄື: ມໍຕົ້ນ ຫົງສາ ແລະ ມໍຕົ້ນບ້ານເມືອງຫານ ມີ 135 ນ້ອງ ຍິງ 66 ນ້ອງ; ສູນ ມສ ນາປຸ່ງ ປະກອບມີ 2 ໂຮງຮຽນຄື:

ມໍຕົ້ນນາປຸ່ງ ແລະ ມໍຕົ້ນບ້ານແທ່ນຄຳ ມີ 120 ນ້ອງ ຍິງ 61 ນ້ອງ; ສູນ ມສ ພູແລ້ງ ມີ 31 ນ້ອງ ຍິງ 16 ນ້ອງ; ສູນ ມສ ຄົກແອກ ມີ 42 ນ້ອງ ຍິງ 22 ນ້ອງ; ສູນມໍຕົ້ນນ້ຳຕັບ ມີ 24 ນ້ອງ ຍິງ 11 ນ້ອງ ແລະ ສູນມໍຕົ້ນທ່າຊວ່າງ ມີ 27 ນ້ອງ ຍິງ 21 ນ້ອງ.

ໂດຍຈັດແບ່ງໃຫ້ມີຫ້ອງສອບເສັງທັງໝົດ 20 ຫ້ອງ, ບັນຈຸນັກສອບເສັງເຂົ້າໜຶ່ງຫ້ອງບໍ່ເກີນ 20-22 ຄົນ ແລະ ມີຄະນະກຳມະການເຝົ້າຍາມຫ້ອງສອບເສັງ 2 ຄົນຕໍ່ຫ້ອງ; ໃນສົກຮຽນນີ້, ກຳນົດໃຊ້ 6 ວິຊາສອບເສັງຄື: ວິຊາ ພາສາລາວ-ວັນນະຄະດີ, ວິຊາ ວິທະຍາສາດທຳມະຊາດ, ວິຊາ ວິທະຍາສາດສັງຄົມ, ວິຊາ ສຶກສາພົນລະເມືອງ, ວິຊາ ພາສາອັງກິດ ແລະ ວິຊາ ຄະນິດສາດ;

ເຊິ່ງການສອບເສັງແມ່ນເລີ່ມສອບເສັງພ້ອມກັນທົ່ວປະເທດ ຄື: ໃນວັນທີ 22 ຫາ 24 ເດືອນກໍລະກົດນີ້, ຈະໃຊ້ເວລາໃນການສອບເສັງທັງໝົດ 3 ວັນເຕັມຈິ່ງຈະໃຫ້ສຳເລັດ.