ການເກັບລາຍຮັບຂອງແຂວງອັດຕະປື ບໍ່ບັນລຸຕາມແຜນ ຍ້ອນການລະບາດຂອງໂຄວິດ19

ການພັດທະນາເສດຖະກິດ-ສັງຄົມ ຂອງແຂວງອັດຕະປື ໃນ 6 ເດືອນຕົ້ນປີ 2020 ແມ່ນບໍ່ບັນລຸຕາມແຜນການທີ່ວາງໄວ້.ຍ້ອນໄດ້ຮັບຜົນກະທົບຈາກການແຜ່ລະບາດຂອງພະຍາດ ໂຄວິດ 19 ທ່ານ ເລັດໄຊຍະພອນ ເຈົ້າແຂວງໆອັດຕະປື ໃຫ້ສຳພາດເມື່ອບໍ່ດົນນີ້ວ່າ: ອີງໃສ່ແຜນພັດທະນາເສດຖະກິດ-ສັງຄົມປະຈຳປີ 2020 ,ຜ່ານການຈັດຕັ້ງປະຕິບັດໃນໄລຍະ 6 ເດືອນຕົ້ນປີ 2020 ການປະຕິບັດການເກັບລາຍຮັບເຂົ້າງົບປະມານປະຕິບັດໄດ້ພຽງແຕ່ 40% ຂອງແຜນການ ສາເຫດຍ້ອນສະພາບຂອງໂລກພາກພື້ນ ແລະ ສະພາບການລະບາດພະຍາດໂຄວິດ-19 ໄດ້ກະທົບໃສ່ຕໍ່ການປະຕິບັດແຜນພັດທະນາສັງຄົມຂອງແຂວງ ໃນ 6 ເດືອນຕົ້ນປີ 2020.


ທ່ານ ເລັດ ໄຊຍະພອນ ເຈົ້າແຂວງໆອັດຕະປື ໄດ້ກ່າວຕື່ມອີກວ່າ: ເມື່ອສະພາບການຂອງແຂວງ ໄດ້ຮັບຜົນກະທົບຈາກພະຍາດໂຄວິດ-19 ຄະນະນໍາ ກໍ່ຄື ອໍານາດການປົກຄອງຂັ້ນທ້ອງຖິ່ນໄດ້ມີການປືກສາກາລື ວາງແຜນຫາວິທີທາງແກ້ໄຂ ປຸກສະດົມ,ສົ່ງເສີມການຜະລິດພາຍໃນແຂວງ ເພີ່ມຂຶ້ນ ຫຼຸດຜ່ອນການນໍາເຂົ້າຈາກຕ່າງແຂວງ ແລະຕ່າງປະເທດ.
ທ່ານ ຍັງໄດ້ກ່າວຕື່ມວ່າ ໃນ 6 ເດືອນທ້າຍປີ 2020 ນີ້ ຖ້າຫາກບໍ່ມີການລະບາດຂອງພະຍາດໂຄວິດ-19 ທາງແຂວງຈະພະຍາຍາມສູ້ຊົນຈັດເກັບລາຍຮັບເຂົ້າງົບປະມານໃຫ້ໄດ້ຕາມແຜນການທີ່ວາງໄວ້ ເພື່ອເຮັດໃຫ້ການພັດທະນາເສດຖະກິດ ມີທ່ວງທາຂະຫຍາຍຕົວຢ່າງຕໍ່ເນື່ອງ ເຮັດໃຫ້ແຂວງອັດຕະປື ໄດ້ຮັບການພັດທະນາ ປະຊາຊົນຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ຂ່າວ: ອູ່ທອງ ສີຫາລາດ