ລູກທໍລະພີ! ເມົາຢາບ້າແລ້ວປະສາດຫລອນ ໃຊ້ພ້າຟັນຄໍພໍ່ເສຍຊີວິດ

ກາງເດືອນພຶດສະພາ ຜ່ານມາ, ໄດ້ມີເຫດການທີ່ບໍ່ຄາດຄິດ ເມື່ອມີລູກຊາຍ ທໍລະພີ ອາຍຸ 29ປີ ກໍ່ເຫດຄາດຕະກຳພໍ່ແທ້ໆຂອງຕົນ ໃນຂະນະທີ່ນອນຫຼັບຢູ່ຖຽງນາ ເຂດບ້ານຫ້ວຍເປັດ ເມືອງແກ່ນທ້າວ ແຂວງໄຊຍະບູລີ. ເຈົ້າໜ້າທີ່ ປກສ ເມືອງແກ່ນທ້າວ ເປີດເຜີຍໃຫ້ຮູ້ວ່າ: ເຫດການສະເທືອນຂັວນດັ່ງກ່າວ ເກີດຂຶ້ນວັນທີ 15 ພຶດສະ ພາ ຜ່ານມາ. ເຊິ່ງຜູ້ກໍ່ເຫດ ຊື່ ທ້າວ ຫຸ້ນ ອາຍຸ 29 ປີ ໄດ້ນຳໃຊ້ພ້າ ຟັນຄໍພໍ່ຂອງຕົນເອງ ຊື່ ທ້າວໃໝ່ ອາຍຸ 56 ປີ ຈົນເສຍຊີວິດຄາທີ່.

 

ຈາກການສອບສວນ ຜູ້ຖືກຫາ ສາລະພາບວ່າ: ເວລາປະມານ 21:30 ໂມງຂອງວັນທີ 14 ພຶດສະພາ, ຕົນເອງໄດ້ເສບຢາບ້າ 1 ເມັດ ແລ້ວກໍເຂົ້ານອນຢູ່ຖຽງນາ. ຮອດເວລາປະມານ 2:00 ໂມງຂອງມື້ຕໍ່ມາ, ພໍ່ໄດ້ເຂົ້າມານອນ ຢູ່ຖຽງນານຳ ແລະ ຕົນໄດ້ບອກພໍ່ຢາກກັບບ້ານ ແຕ່ພໍ່ບໍ່ໃຫ້ກັບບ້ານເທື່ອ; ຕໍ່ມາ ພໍ່ໄດ້ລຸກຂຶ້ນມາ ປີ້ງອື່ງໃຫ້ຕົນເອງກິນເຂົ້າ. ເວລານັ້ນ, ພໍ່ຮູ້ສຶກຢາກນອນແຮງ ຈຶ່ງບອກໃຫ້ຕົນໄປເຝົ້າປີ້ງອື່ງແທນ ແລ້ວພໍ່ກໍເຂົ້ານອນ. ພາຍຫຼັງຕົນເອງເຝົ້າປີ້ງອື່ງ ໄດ້ປະ ມານ 20 ນາທີ ກໍເກີດອາການປະສາດຫຼອນ ຍ່າງເຂົ້າໄປຈັບເອົາພ້າຢູ່ຖຽງນາ ມາຟັນຖືກບໍລິເວນຄໍຫອຍ ພໍ່ 1 ບາດ. ເວລານັ້ນ, ພໍ່ໄດ້ລຸກຂຶ້ນ ຕົນກໍຟັນຊ້ຳຈຸດເກົ່າ ຕື່ມອີກ 2 ບາດ ຈົນເຮັດໃຫ້ພໍ່ເສຍຊີວິດ.

ພາຍຫຼັງກໍ່ເຫດ. ຕົນເອງກໍໄດ້ຍ່າງໄປບອກເອື້ອຍ ທີ່ນອນຢູ່ຖຽງນາໃກ້ກັນ.ຈາກນັ້ນ, ເອື້ອຍພ້ອມຍາດພີ່ນ້ອງ ໄດ້ພາ ກັນໄປຈຸດເກີດເຫດ ແລ້ວແຈ້ງຕໍ່ອົງການປົກຄອງບ້ານ ປະ ສານຫາເຈົ້າໜ້າທີ່ ປກສ ເຂົ້າຈັບຕົນ ໄປດຳເນີນຄະດີຕາມກົດໝາຍ.

ຂ່າວ: ນສພ ຄວາມສະຫງົບ