ກັກຕົວຄ້າຂາຍຢາເສບຕິດ ໄດ້ 03 ຄົນພ້ອມຂອງກາງ ເຮໂລອິນ ຈໍານວນ 100 ແທ່ງ ນໍ້າໜັກ 38,04 Kg

ທ້າຍເດືອນ ມີນາ 2020 ຜ່ານມານີ້ ໜ່ວຍງານສະກັດກັ້ນ ຕ້ານຢາເສບຕິດ ປກສ ເມືອງຍອດອູ ໄດ້ຮັບແຫຼ່ງຂ່າວຈາກຜົນລະເມືອງດີວ່າ: ມີກຸ່ມຄົນບໍ່ດີເຄື່ອນໄຫວລັກລອບຂົ່ນສົງຢາເສບຕິດແຕ່ ເມືອງບຸນເໜືອໄປຫາເມືອງຍອດອູ.

ດັ່ງນັ້ນ, ເຈົ້າໜ້າທີ່ວິຊາສະເພາະຈຶ່ງໄດ້ ຕັ້ງດ່ານກວດ ຕາມຈຸດເປົ້າໝາຍຢ່າງເຂັ້ມງວດ ພໍມາຮອດເວລາ 06 ໂມງ 30 ນາທີ ຂອງວັນທີ ວັນທີ 28 ມີນາ 2020 ເຈົ້າໜ້າທີ່ກຸ່ມ ບ້ານສຸມຄໍາ ເມືອງຍອດອູ ໄດ້ກັກລົດເປົ້າໝາຍພ້ອມທັງກວດຄົ້ນພາຍໃນລົດຄັນດັ່ງກ່າວ ແລະ ສາມາດກັກຕົວເປົ້າໝາຍໄດ້ 03 ຄົນຊື່ ທ້າວ ຄໍາສຸກ ລາວເຈົ່າ ອາຍຸ 30 ປີ, ອາຊີບຊາວນາ, ທ້າວ ຄໍາພອນ ອາຍຸ 36 ປີ, ອາຊີບຊາວນາ, ທ້າວອາວູ ລາວລີ, ອາຍຸ 22 ປີ, ອາຊີບຊາວນາ ທັງສາມຄົນແມ່ນຢູ່ບ້ານ ຫລົງທາງ ເມືອງຍອດອູ ແຂວງຜົ້ງສາລີ ພ້ອມຂອງກາງຢາເສບຕິດປະເພດ ເຮໂລອິນ ຈໍານວນ 100 ແທ່ງ ນໍ້າໜັກ 38,04 Kg, ລົດກະບະລີໂວ ສີ ຂາວດໍາ ປ້າຍທະບຽນ ວຫ 6689 ກໍາແພງນະຄອນ 01 ຄັນ, ເງິນຈີນ 1,000 ຢວນ, ໂທລະສັບ 05 ໜ່ວຍ, ປື້ມຜ່ານແດນ 01 ຫົວ, ປື້ມທະບຽນລົດ 01 ຫົວ, ບັດ ATM 01 ບັດ, ບັດປະຈໍາຕົວ 01 ບັດ, ບັດຂັບຂີ່ 01 ບັດ, ມາດໍາເນີນການສືບສວນ-ສອບສວນ.

ຜ່ານການສືບສວນ-ສອບສວນຂອງເຈົ້າໜ້າທີໃນເບື້ອງຕົ້ນ ຜູ້ກ່ຽວທັງສາມໄດ້ຮັບສາລະພາບວ່າ ຢາເສບຕິດປະເພດ ເຮໂລອິນຈໍານວນດັ່ງກ່າວ ແມ່ນເປັນຂອງຜູ້ກ່ຽວທັງສາມແທ້. ປັດຈຸບັນຄະດີດັ່ງກ່າວທາງເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຜົ້ງສາລີ ພວມດໍາເນີນການສອບສວນ ຂະຫຍາຍຜົນຫາກຸ່ມແກ້ງຮ່ວມຂະບວນການ ມາດໍາເນີນຄະດີຕາມລະບຽບກົດໝາຍບ້ານເມືອງຢ່າງເຂັ້ມງວດ.

ພາບ-ຂ່າວ: ປກສ ແຂວງຜົ້ງສາລີ