WHO ເຕືອນຍັງຈະຢູ່ຮ່ວມກັນອີກດົນ

ສຳນັກຂ່າວຕ່າງປະເທດລາຍງານຈາກເມືອງເຈນີວາ ປະເທດສະວິດເຊີແລນ ເມື່ອວັນທີ 23 ເມສາວ່າ ທ່ານໝໍ ເທດຮອສ ແອດນາຮອມ ເກເບຣເຍຊຸສ ຜູ້ອຳນວຍການອົງການອະນາໄມໂລກ (WHO) ຖະແຫຼງເມື່ອວັນພຸດ ກ່ຽວກັບສະຖານະການການແຜ່ລະບາດຂອງພະຍາດ ໂຄວິດ-19 ວ່າ ພະຍາດດັງກ່າວຈະຍັງຢູ່ຮ່ວມກັບມະນຸດ ອີກດົນ ຫມາຍຄວາມວ່າຫົນທາງສູ່ການມີໄຊຊະນະເຫນືອພະຍາດນີ້ ຍັງອີກຍາວໄກ ດັງນັ້ນການດຳເນີນງານຂອງທຸກຝ່າຍ ຈະຜິດພາດບໍ່ໄດ້


ທ່ານໝໍ ເທດຣອສກ່າວວ່າ ປະເທດສ່ວນໃຫ່ຍຍັງຢູ່ໃນ ໄລຍະທຳອິດ ( ເລີ່ມຕົ້ນ ) ຂອງການແຜ່ລະບາດ ຂະນະທີ່ບາງປະເທດຊື່ງກຳລັງພົບກັບການແຜ່ລະບາດເປັນກຸ່ມທຳອິດທີ່ກຳລັງແຜ່ລະບາດ ໃນຮອບທີ່ສອງ ດ້ານທ່ານໝໍ  ໄມເຄິລ ໄຣອັນ ປະທານໂຄງສຸກເສີນດ້ານສາທາລະນະສຸກຂອງ WHO ກ່າວເຖິງການກັບມາເປີດເສັ້ນທາງການບິນພົນລະເຮືອນລະຫວ່າງປະເທດອີກຄັ້ງ ວ່າຕ້ອງມີການບໍລິຫານຈັດການຄວາມສ່ຽງໃຫ້ດີຄວບຄູ່ກັນໄປດ້ວຍ

ທັງນີ້ WHO ກຳລັງຕິດຕາມຢ່າງໃກ້ຊິດກັບສະຖານະການການແຜ່ລະບາດຂອງໂລກໂຄວິດ-19 ໃນທະວີບແອຟຣິກາທີ່ການລະບາດແຜ່ໄປແລ້ວຢ່າງໜ້ອຍ 56 ປະເທດແລະເຂດໃກ້ຄ້ຽງ ມີຜູ້ປ່ວຍສະສົມລວມກັນຫລາຍກວ່າ 25,000 ຄົນ ແລະເສຍຊີວິດສະສົມແລ້ວປະມານ 1,200 ຄົນ ທ່ານໝໍ ໄຣອັນກ່າວວ່າ ສະຖານະການພະຍາດໂຄວິດ-19 ໃນທະວີບແອຟຣິກາ ພຽງແຕ່ເລີ່ມຕົ້ນ ແລະຕ້ອງເຝົ້າລະວັງຫລາຍເປັນພິເສດ ໂດຍສະຖິຕິຜູ້ຕິດເຊື້ອໃນໂຊມາເລຍຕອນນີ້ມີຢ່າງໜ້ອຍ 286 ຄົນ ແຕ່ເພີ່ມຂື້ນເກືອບ 300% ພາຍໃນເວລາບໍ່ເຖິງ 1 ອາທິດ

ກ່ຽວກັບປະເດັນທີ່ອາເມຣິກາລະງັບງົບປະມານສະຫນັບສະຫນູນການດຳເນີນງານຂອງດັບເບິລຢູເອຊໂອ ທ່ານໝໍ ເທດຣອສ ຫວັງວ່າລັດຖະບານວໍຊິງຕັນຈະທົບທວນເລື່ອງດັງກ່າວ ໃຫ້ພາລະກິດຊ່ວຍເຫລືອມະນຸດຊາດຈາກພະຍາດຮ້າຍຂັບເຄື່ອນໄປໄດ້ຕໍ່ໄປຢ່າງສະດວກ ແລະຖິ້ມທ້າຍວ່າການປະກາດໃຫ້ພະຍາດໂຄວິດ-19 ເປັນພາວະສຸກເສີນດ້ານສາທາລະນະສຸກລະຫວ່າງປະເທດ ເມື່ອວັນທີ່ 30 ມັງກອນ ແລະຕາມດ້ວຍການເປັນພະຍາດລະບາດໃຫ່ຍ ເມື່ອວັນທີ່ 11 ມີນາ ເປັນການປະເມີນສະຖານະການຢ່າງເຫມາະສົມທີ່ສຸດແລ້ວ ໂດຍສະເພາະຢ່າງຍິ່ງໃນການປະກາດເມື່ອທ້າຍເດືອນມັງກອນນັ້ນ ຜູ້ປ່ວຍນອກຈີນຍັງມີບໍ່ເຖິງ 100 ຄົນ ແລະຍັງບໍ່ມີໃຜເສຍຊີວິດ


ໃນອີກດ້ານຫນື່ງ ທ່ານເຈເຣມີ ຟາຣຣາ ຜູ້ອຳນວຍການກອງທືນລະຫວ່າງປະເທດດ້ານສຸຂະພາບ ເວລຄັມ ທຣັສ ກ່າວວ່າໃນທີ່ສຸດມະນຸດຕ້ອງສະແຫວງຫາຫົນທາງທີ່ຈະໃຊ້ຊີວິດຢູ່ຮ່ວມກັບໂຄວິດ-19 ຊື່ງບໍ່ແມ່ນເຊື້ອພະຍາດທີ່ ກໍໂຕຂື້ນ ແຜ່ລະບາດ ແລ້ວຫາຍໄປ ໂດຍຈະບໍ່ກັບມາອີກ