ປູຕິນ ຢ້ຽມຢາມຊີເຣຍທ່າມກາງສະຖານະການເຄັ່ງຕຶງລະຫວ່າງອີຣ່ານ ກັບອາເມີຣິກາ

ສຳນັກຂ່າວຕ່າງປະເທດລາຍງານ ເມື່ອວັນທີ່ 7 ມັງກອນ 2020 ວ່າ ທ່ານວາລາດີເມຍ ປູຕິນ ປະທານາທິບໍດີຣັດເຊຍ ເດີນທາງຢ້ຽມຍາມຊີເຣຍ ໂດຍບໍ່ໄດ້ແຈ້ງຫມາຍລ່ວງຫນ້າ ອີກທັງຖະແຫຼງການບໍ່ເອີ່ຍເຖິງສະຖານະການໃນອີຣ່ານທີ່ຢູ່ໃກ້ຄຽງ ທ່າມກາງສະຖານະການເຄັ່ງຕຶງໃນພູມມີພາກນີ້ ຈາກການປະເຊີນຫນ້າລະຫວ່າງອາເມຣິກາກັບອີຣ່ານ ຫລັງເຫດໂດຣນກອງທັບອາເມຣິກາລອບສັງຫານນາຍພົນຄົນສຳຄັນຂອງອີຣ່ານ ກັສເຊັມ ໂຊໄລມານີ


ທ່ານປູຕິນ ເດີນທາງມາພົບທ່ານຊາຣ ອັລ-ອັສຊາດ ປະທານາທິບໍດີຊີເຣຍ ພັນທະມິດຄົນສຳຄັນທີ່ເຮັດໃຫ້ຣັດເຊຍສົ່ງທະຫານ ແລະອາວຸດເຂົ້າຮ່ວມຮົບສົງຄາມກາງເມືອງໃນຊີເຣຍຕັ້ງແຕ່ປີ 2014 ຊ່ວງທີ່ລັດຖະບານຊີເຣຍເກືອບພ່າຍແພ້ ຈົນຟື້ນຄືນກັບມາໄດ້ ໂດຍມີນາຍພົນໂຊໄລມານີຂອງອີຣ່ານເປັນແນວຮ່ວມ ສົ່ງກອງກຳລັງນັກຮົບທີ່ອີຣ່ານຫນຸນຫລັງເຂົ້າມາຊ່ວຍ ແລະປະເຊີນຫນ້າກັບອາເມຣິກາທີ່ສົ່ງກອງກຳລັງ 600 ຄົນເຂົ້າມາຊີເຣຍ


ການຢ້ຽມຢາມຊີເຣຍລະຫວ່າງເກີດສົງຄາມຄັ້ງນີ້ເປັນຄັ້ງທີ່ສອງຂອງທ່ານປູຕິນ ສອດຄ່ອງກັບສະຖານະການທີ່ຣັດເຊຍພະຍາຍາມຊ່ວຍລັດຖະບານຊີເຣຍບຸກຍຶດແຂວງອິດລິບ ພາກຕາເວັນຕົກສ່ຽງເຫນືອຂອງຊີເຣຍ ຖານທີ່ຫມັ້ນສຸດທ້າຍຂອງກຸ່ມກະບົດ

ທ່ານດິມິທຣີ ເປສຄອຟ ໂຄສົກລັດຖະບານຣັດເຊຍເຜີຍວ່າ ທ່ານປູຕິນ ແລະທ່ານອັສຊາດ ພົບກັນທີ່ສູນບັນຊາການທາງທະຫານຂອງຣັດເຊຍໃນນະຄອນດາມັສກັສ ເມືອງຫລວງຂອງຊີເຣຍ ເພື່ອຮັບຟັງສະຖານະການສູ້ຮົບລ່າສຸດ ທ່ານປູຕິນກ່າວວ່າ ການຟື້ນຟູບູລະນະຊີເຣຍ ແລະລວມດິນແດນເປັນເສັ້ນທາງອັນຍາວໄກ


ຜູ້ນຳທັງສອງຍັງຢ້ຽມຢາມມັສຢິດອຸເມຍຢາດ ເບື້ອງເມືອງເກົ່າ ແລນມາຣກຂອງເມືອງຫລວງຊີເຣຍ ແລະຊົມສຸສານຂອງ ຈອນ ເດະ ແປບຕິສ ຜູ້ອຸທິດຕົນໃຫ້ທັງຊາວຄຣິສ ແລະຊາວມຸສລິມ ນອກຈາກນີ້ທ່ານປູຕິນຍັງສະແດງຄວາມຍິນດີກັບທະຫານຣັດເຊຍໃນຊ່ວງວັນຢຸດຄຣິສມາສຂອງນິກາຍອໍໂທດອກຊທີ່ມະຫາວິຫານໃນນະຄອນດາມັສກັສ


ສຳລັບສົງຄາມກາງເມືອງຊີເຣຍທີ່ດຳເນີນມາດົນກ່ວາ 9 ປີ ນັບຈາກປີ 2011 ເຮັດໃຫ້ຊາວຊີເຣຍອົບພະຍົກຍ້າຍຖິ່ນຖານຈາກບ້ານເຮືອນແລ້ວ 11 ລ້ານຄົນ ໃນຈຳນວນນີ້ 5 ລ້ານຄົນອົບພະຍົກອອກນອກປະເທດ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *