ລາວ ເລັ່ງຍົກລະດັບຄວາມຮູ້ກ່ຽວກັບເຕັກນິກທາງລົດໄຟ ເພື່ອຮອງຮັບທາງລົດໄຟ ລາວ-ຈີນ

ພະນັກງານຈາກກະຊວງໂຍທາທິການ ແລະ ຂົນສົ່ງ ແລະ ພາກສ່ວນທີ່ກ່ຽວຂ້ອງກັບໂຄງ ການທາງລົດໄຟ ລາວ-ຈີນ ຢູ່ສູນກາງ ແລະ ທ້ອງຖິ່ນ ຈຳນວນ 45 ທ່ານ ພວມໄດ້ຮັບການຍົກລະດັບຄວາມຮູ້ກ່ຽວກັບເຕັກນິກທາງລົດໄຟ ເພື່ອຮອງຮັບໃຫ້ແກ່ໂຄງການທາງລົດໄຟ ລາວ-ຈີນ, ເຊິ່ງຄາດວ່າຈະສໍາເລັດໃນປີ 2021 ນີ້.

ກອງປະຊຸມຝຶກອົບຮົມເຕັກນິກທາງລົດໄຟ ສຳລັບປະເທດລາວ ປະຈຳປີ 2019, ເຊິ່ງຈັດໂດຍມະ ຫາວິທະນາໄລ ຄົມມະນາຄົມ ປັກກິ່ງ ແລະ ສະໜັບສະໜູນໂດຍ ກະຊວງການຄ້າ ສປ ຈີນ ໄດ້ຈັດຂຶ້ນທີ່ນະຄອນຫລວງວຽງຈັນ ໃນລະຫວ່າງວັນທີ 8-28 ພະຈິກ 2019 ເຊິ່ງໄດ້ຮັບການບັນລະຍາຍ ແລະ ແລກປ່ຽນບົດຮຽນຈາກຊ່ຽວຊານ ແລະ ຄູ-ອາຈານ ທີ່ມີປະສົບການ ຈາກ ສປ ຈີນ.

ໂອກາດນີ້, ທ່ານ ອານົງເດດ ຈັນທະລາດ ຮອງຫົວໜ້າຫ້ອງການຄະນະກຳມະການຮ່ວມມື ລາວ-ຈີນ ກ່່າວວ່າ: ມາຮອດປັດຈຸບັນ ໂຄງການການກໍ່ສ້າງເສັ້ນທາງລົດໄຟ ລາວ-ຈີນ ມີຄວາມຄືບໜ້າແລ້ວປະມານ 70% ແລະ ຄາດວ່າຈະໃຫ້ສໍາເລັດໃນປີ 2021. ໂຄງການດັ່ງກ່າວ, ເປັນໂຄງການຮ່ວມມືຂະ ໜາດໃຫຍ່ ແລະ ມີລັກສະນາຍຸດທະສາດຂອງສອງຝ່າຍ, ເຊິ່ງໃນໄລຍະການກໍ່ສ້າງ ແລະ ການຄຸ້ມຄອງການບໍລິຫານໂຄງການ ໄດ້ຮຽກຮ້ອງໃຫ້ມີພະນັກງານວິຊາການ ທີ່ມີຄວາມຮູ້ຄວາມສາມາດຈຳນວນຫລາຍມາປະຈຳຢູ່ແຕ່ລະຕຳແໜ່ງງານ.

ອີກດ້ານໜຶ່ງ ປະເທດລາວ ເຖິງແມ່ນວ່າຈະມີເສັ້ນທາງລົດໄຟ ແຕ່ໂຄງ ການທາງລົດໄຟ ລາວ-ຈີນ ທີ່ມີຄວາມຍາວກວ່າ 400 ກິໂລແມັດ ແລະ ຕັດຜ່ານພູຜາ ແລະ ຊຸມຊົນ ແມ່ນລາວເຮົາບໍ່ເຄີຍມີມາກ່ອນ.

ເພື່ອຮອງຮັບໃຫ້ແກ່ໂຄງການທາງລົດໄຟ ລາວ-ຈີນ, ຄະນະກຳມະການຮ່ວມມື ລາວ-ຈີນ ຈຶ່ງໄດ້ປະສານສົມທົບກັບພາກສ່ວນທີ່ກ່ຽວຂ້ອງ ເພື່ອຍາດແຍ່ງເອົາການຊ່ວຍເຫລືອ ຈາກ ລັດຖະບານ ສປ ຈີນ ໃນການຈັດຊຸດຝຶກອົບຮົມ ແລະ ສຳມະນາກ່ຽວກັບການຍົກລະດັບເຕັກນິກທາງລົດໄຟ ບໍ່ວ່າຈະຈັດຢູ່ລາວ ຫລື ຢູ່ຈີນ. ສໍາລັບຊຸດຝຶກອົບຮົມເຕັກນິກທາງລົດໄຟ ທີ່ຈັດຢູ່ລາວນັ້ນ ໄດ້ສໍາເລັດແລ້ວ 5 ຊຸດ.

ນອກຈາການຈັດຊຸດຝຶກອົບຮົມແລ້ວ, ສອງຝ່າຍ ລາວ-ຈີນ ກໍໄດ້ລິເລີ່ມໃນການທີ່ຈະສ້າງຕັ້ງໂຮງງານວິຊາຊີບເຕັກ ນິກການລົດໄຟລາວ, ເຊິ່ງໃນເດືອນກັນຍາ 2019 ສອງລັດຖະບານ ລາວ-ຈີນ ກໍໄດ້ມີການເຊັນສານແລກປ່ຽນວ່າດ້ວຍ ລັດຖະບານ ສປ ຈີນ ຍິນດີທີ່ຈະຊ່ວຍເຫລືອ ສປປ ລາວ ກໍ່ສ້າງວິທະຍາໄລວິຊາຊີບເຕັກນິກລົດໄຟລາວ ແລະ ຄາດວ່າຈະເລີ່ມລົງມືອອກແບບກໍ່ສ້າງໃນປີ 2020.

ທ່ານ ອານົງເດດ ຈັນຍາລາດ ສະແດງຄວາມເຊື່ອໝັ້ນວ່າ: ຜ່ານການຮຽນໃນຫ້ອງຮຽນ ແລະ ການໄປເບິ່ງຕົວຈິງ ຈະເຮັດໃຫ້ນັກສຳມະນາກອນໄດ້ຮຽນຮູ້ ແລະ ເຂົ້າໃຈຫລາຍຂຶ້ນ ກ່ຽວກັບເຕັກນິກທາງລົດໄຟ ແລະ ຄວາມຄືບໜ້າຂອງໂຄງການທາງລົດໄຟ ລາວ-ຈີນ, ພ້ອມກັນນັ້ນ ກໍຈະເປັນເງື່ອນໄຂອັນດີໃຫ້ແກ່ການສ້າງຄວາມຮັກແພງ, ເຂົ້າໃຈເຊິ່ງກັນ ແລະ ກັນ ລະຫວ່າງບັນດານັກສຳມະນາກອນດ້ວຍກັນ.

ໃນນາມຕາງໜ້າຫ້ອງການຄະນະກຳມະການຮ່ວມມື ລາວ-ຈີນ ໄດ້ສະແດງຄວາມຂອບໃຈມາຍັງທຸກພາກ ສ່ວນທີ່ໃຫ້ການຊ່ວຍເຫລືອ ແລະ ສະໜັບສະໜູນໃນການຈັດຊຸດຝຶກອົບຮົມໃນຄັ້ງນີ້. ມະຫາວິທະຍາໄລ ຄົມມະນາຄົມ ປັກກິ່ງ ມີປະຫວັດສາດອັນຍາວນານ ກ່ຽວກັບການຮຽນການສອນດ້ານຄົມມະນາຄົມ ແລະ ວິຊາສະເພາະດ້ານການລົດໄຟ ທີ່ຮັບປະກັນມາດຕະຖານເຕັກນິກຂອງ ສປ ຈີນ.

ຂໍ້ມູນ: ຂປລ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *